chand kab se hai sar-e-shakh-e-sanobar atka
ghas shabnam mein sharabor hai shab hai aadhi

baam suna hai, kahan dhunden kisi ka chehra
(log samjhenge ki be-rabt hain baaten apni)

sher ugte hain dukhi zehn se konpal konpal
kaun mausam hai ki bharpur hain gham ki belen

dur pahunche hain sarakte hue ude baadal
chand tanha hai (agar us ki balaen le len?)

dosto ji ka ajab haal hai, lena badhna
chandni raat hai katik ka mahina hoga

mir-e-maghfur ke ashaar na paiham padhna
jine walon ko abhi aur bhi jina hoga

chand thithka hai sar-e-shakh-e-sanobar kab se
kaun sa chand hai kis rut ki hain raaten logo

dhund udne lagi bunne lagi kya kya chehre
achchhi lagti hain diwanon ki si baaten logo

bhigti raat mein dubka hua jhingar bola
kasmasati kisi jhadi mein se khushbu lapki

koi kakul koi daman, koi aanchal hoga
ek duniya thi magar hum se sameti na gai

ye bada chand chamakta hua chehra khole
baitha rahta hai sar-e-baam-e-shabistan shab ko

hum to is shahr mein tanha hain, hamin se bole
kaun is husn ko dekhega ye is se puchho

sone lagti hai sar-e-sham ye sari duniya
in ke hujron mein na dar hai na daricha koi

in ki qismat mein shab-e-mah ko rona kaisa
in ke sine mein na hasrat na tamanna koi

kis se is dard-e-judai ki shikayat kahiye
yan to sine mein niystan ka niystan hoga

kis se is dil ke ujadne ki hikayat kahiye
sunne wala bhi jo hairan nahin, hairan hoga

aisi baaton se na kuchh baat banegi apni
suni aankhon mein nirasha ka ghulega kajal

khali sapnon se na auqat banegi apni
ye shab-e-mah bhi kat jaegi be-kal be-kal

ji mein aati hai ki kamre mein bula len is ko
chand kab se hai sar-e-shakh-e-sanobar atka

raat us ko bhi nigal jaegi bolo bolo
baam par aur na aaega kisi ka chehra