khak-e-gulshan ko gul-fishan kar lo
zarra-zarra ko kahkashan kar lo

waqt hai ab bhi ai chaman walo
apna mahfuz aashiyan kar lo

khak-e-gulshan ki azmaton ki qasam
ab bhi tamir gulsitan kar lo

rukh hawadis ka jab ho su-e-chaman
zad mein tufan ke aashiyan kar lo

hai zarurat qadam mila ke chalo
azm-e-manzil ko kaamran kar lo

muntashir ho ke ji nahin sakte
ham-nashinon ko ham-zaban kar lo

yahi paigham hai 'hilal' apna
daur-e-jamhur jawedan kar lo