suni hai rahguzar-e-ghazal kah rahi hun main
bole hai chaukidar ghazal kah rahi hun main

fursat nahin jo din ko main fikr-e-sukhan karun
raaton ko mara mar ghazal kah rahi hun main

aai jo nind khwab mein bazm-e-sukhan saji
ab ho ke hoshiyar ghazal kah rahi hun main

hai machchharon ne kat ke behaal kar diya
ab ho ke sharmsar ghazal kah rahi hun main

kyun bhunkte hain zor se kutte pados ke
in par khuda ki mar ghazal kah rahi hun main

phir non tel lakdi ka aane laga khayal
ab ho ke hoshiyar ghazal kah rahi hun main

khatun-e-khana-dar bhi hun shaera bhi hun
hain kaam be-shumar ghazal kah rahi hun main