lafz kab se mere zehn ke surakh se jhank raha hai jahan zulmat qarnon se raj karti hai aur khayal ke jale latke pade hain auham ki chamgadaden diwaron se chipki hui hain soch ke pani par kai jami hai mere zehn ke darichon mein koi aisi darz bhi nahin jahan se hawa dakhil ho kar mayusi ki habs ko chat le aur koi rauzan bhi nahin jahan se raushni ilham ban kar utre lekin lafz ke jugnu ne apni raushni se is mein surakh kar dala hai wo dekho lafz dekh raha hai lekin nahin wo to ja chuka hai aur sadiyon se muqaffal khamoshi karwat le kar phir so chuki hai