nigahon se ojhal raho tum
hazaron pardon ke pichhe ghaeb ho jao

aur dil mein
aisa sannata chha jae

jaisa janaza nikalne ke baad
kisi ghar mein hota hai

lekin na jaane kya hai
ki jab khwab aur bedari ke darmiyan

khoi khoi si
alam-nak bojhal raat

khatm hone ke qarib aati hai
aur bechaini khud

thaki haari be-hoshi ke
gale mein bahen dal kar

so jati hai
unhin

bhor ke adh-jage adh-soe
dhundlakon mein

aisa lagta hai
ki meri band

aansu bhari
dabdabai aankhon ko

kisi ne halke se chum liya