main andhere ki phaili hui khaiyon mein jo gum ho gaya hun
to is ki wajah ye nahin hai

ki mujh mein ziya-bar kirnon ka fuqdan hai
ya raushni ki tamazat ko sahne ka hamil nahin hun

haqiqat to ye hai
jise raushni ka tum mamba samajh kar

azal se tawaf-e-mukarrar mein masruf ho
wo tumhaare hi andar ki simti hui tarikiyon ke siwa kuchh nahin hai

aur main!
main mujassam munawwar-nigahi ki khwahish liye

safar mein raha hun
safar mein rahunga abad tak!!