khudi ka sirr-e-nihan la-ilaha-illallah
khudi hai tegh fasan la-ilaha-illallah
ye daur apne barahim ki talash mein hai
sanam-kada hai jahan la-ilaha-illallah
kiya hai tu ne mata-e-ghurur ka sauda
fareb-e-sud-o-ziyan la-ilaha-illallah
ye mal-o-daulat-e-duniya ye rishta o paiwand
butan-e-wahm-o-guman la-ilaha-illallah
khirad hui hai zaman o makan ki zunnari
na hai zaman na makan la-ilaha-illallah
ye naghma fasl-e-gul-o-lala ka nahin paband
bahaar ho ki khizan la-ilaha-illallah
agarche but hain jamaat ki aastinon mein
mujhe hai hukm-e-azan la-ilaha-illallah