kal hamesha ki tarah us ne kaha ye phone par
main bahut masruf hun mujh ko bahut se kaam hain

is liye tum aao milne main to aa sakti nahin
har riwayat tod kar is bar main ne kah diya

tum jo ho masruf to main bhi bahut masruf hun
tum jo ho mashhur to main bhi bahut maruf hun

tum agar ghamgin ho main bhi bahut ranjur hun
tum thakan se chur to main bhi thakan se chur hun

jaan-e-man hai waqt mera bhi bahut hi qimti
kuchh purane doston ne milne aana hai abhi

main bhi ab farigh nahin mujh ko bhi lakhon kaam hain
warna kahne ko to sab lamhe tumhaare nam hain

meri aankhen bhi bahut bojhal hain sona hai mujhe
ratjagon ke baad ab nindon mein khona hai mujhe

main lahu apni anaon ka baha sakta nahin
tum nahin aatin to milne main bhi aa sakta nahin

us ko ye kah ke 'wasi' main ne receiwer rakh diya
aur phir apni ana ke panw pe sar rakh diya