meri sab majburiyan kahti hain sahraon mein chal
phir unhin tanhaiyon mein phir se aazaron mein chal

ya shabistan-e-digar mein maut ke baghon mein chal
ai gham-e-dil kya karun ai wahshat-e-dil kya karun

subh-e-nau ki hasraten sab sham ho ke rah gain
aarzuen khwahishen aalam ho ke rah gain

sari khushiyan qaidi-e-arqam ho ke rah gain
ai gham-e-dil kya karun ai wahshat-e-dil kya karun

bas mera nala-e-gham hai ek nishan-e-kushtagan
dhundhta hun mazi apna dhundo rah-e-raftagan

na-rasa aah-e-alam hai aamad-o-shud raegan
ai gham-e-dil kya karun ai wahshat-e-dil kya karun

tirgi-e-sham-e-gham mujh par fida hai kya karun
dam-ba-dam mera kaleja nuch raha hai kya karun

ye to bas anjam-e-shab ki ibtida hai kya karun
ai gham-e-dil kya karun ai wahshat-e-dil kya karun

nim-jaan dil pe alam bhaari na ho jae kahin
is badan se ruh bhi aari na ho jae kahin

mujh pe wahshat ka fusun tari na ho jae kahin
ai gham-e-dil kya karun ai wahshat-e-dil kya karun