main masjid-e-ahmarin ke daman pe sabt patthar
nawah-e-hairat-kada tilismat-e-afiyat tha

na mera fikr-o-nazar se rishta na mera iham-goi shewa
faqat main shahid ibaadaton se chamakte lamhon ki dastan ka

darun-e-masjid khade manare azan dete
to wadi-e-ishq se tulua namaz hoti

imam aur muqtadi safiran-e-ahl-e-iman
huzur-yabi ki nudraton se kalam karte salam karte

main masjid-e-ahmarin ke daman pe sabt patthar
gawah-e-awwal gawah-e-akhir hun us khajil lamha-e-qafas ka

jab aainon ki ragon mein taza lahu ki hairat
ka khun hua tha

ajab tulua sahar hui thi
falak ki surkhi utar ke chashm-e-tapan mein aai

chahaar samton mein khandaqen thin
faza mein raqsan thi bu-e-wahshat

darun-e-masjid bhi kalma-go the
wo kalma-go the ki jin ke hathon mein aslaha tha

chahaar jaanib gharon mein qaidi the
jin ke honton se bad-duaen phisal rahi thin

main qalb-e-shahr-e-salam andar
nam-o-tabassum se aashna tha magar ye din the

khajil fasanon ki bazyabi ki suraton ke
safir aate safir jate bilakte bachchon ki aah-o-zari

nahif lahjon ki kapkapahat samaaton se ulajh rahi thi
faza mein tha khauf dhund jaise

darun-e-masjid wo ahal-e-mimbar wo ahl-e-jubba
sifaraton ki sabil-e-makhlut mein ulajh kar

siraat-e-abyaz se hat gae the
main dar gaya tha main masjid-e-ahmarin ke daman pe sabt patthar

main istada hun ab bhi lekin
na masjid-e-ahmarin hai waisi na muqtadi hain na tifl-o-madar

na ahl-e-mimbar hain jin ki taqrir ne fazaon ka sans khincha
na shorishen shahr-e-kalma-go mein

magar haqiqat mein kya hua tha
lahu main luthdi safon se puchho

chaman mein murda sifaraton ki shabihen dekho
main masjid-e-ahmarin ke daman pe sabt patthar

kai zamanon se ro raha hun
mujhe basarat nahin basirat se dekhiyega