dil mein kab se rim-jhim karti
kaisi barkha baras rahi hai

is barkha ke amrit ras se
bhig chuki main bhig chuki main

lagti chhupti dhup aur baadal
ye aakash ke nanhe baalak

khel rahe hain hanste hanste
kilkari bharte sabze ko

shokh hawaen chhed rahi hain
main bhi apne pankh jhatak kar

par taulun aur bharun udanen
apne badan mein khud kho jaun

ye tan ka aakash ye dharti
dhire dhire phail rahi hai

aur mere hathon ke pakheru
ye chanchal bechain parinde

ek anokhe raaz se be-kal
dharti mein kuchh dhund rahe hain

dhund rahe hain aise pal ko
jis ki khoj mein dil rahta hai

jis pal dharti mile gagan se
wo pal mere tan ke bahar

kahin nahin hai kahin nahin hai
ye panchhi ye narm pakheru

janmon se dharti ke sangi
is kaya ke tal kinare

dhire dhire dhund rahe hain
khoe hue pal ki kankariyan