meri purani bosida diary ke pannon par kuchh purani yaadon ke sae hain kuchh purani ghazlen hain kuchh adhuri nazmen hain sochti hun un nazmon ko mukammal kar lun phir sochti hun ye nazmen to meri mohabbat se wabasta hain aur mohabbat tum bin adhuri hai batao tum hi kaise in nazmon ko kam karun kaise wo an-kahi ghazlen sunaun tumhein ki jin mein tadap rahi hai mohabbat machal rahi hai ulfat teri justuju teri talash jari hai zindagi mujh pe bhaari hai sochti hun kahan ja ke panah lun wadi-e-mohabbat mein ya apni adhuri nazmon mein