ye jo aawaz aati hai kabhi mandir kabhi masjid ki jaanib se saham jata hun jaane kyon ye aawazen kabhi mujh ko sukun deti thin lekin ab inhen sun kar upajta hai ajab ek dar tabahi ka ki jaise jai bhawani kah ke jaez hai kisi ka qatl kar dena kisi ki jaan le lena ki jaise nara-e-takbir dhul dega gunahon ko so jab aawaz aati hai aarti aur azanon ki main dar se kanp jata hun main ek bachchi ki ungli tham leta hun ki shayad wo naya rasta dikhae aur badal de mazhabon ke ye nae maani