main hun sar-chashma-e-awwal se bahut dur
pae-nur bhatakne wala

raushni aks-ba-aks aati hai in aankhon tak
aaine apni khayanat se nahin khud waqif

in ko malum nahin
zawiye in ke badal dete hain kirnon ka mizaj

aaj is nur-e-moharraf se hai aankhon mein thakan
dil mein khannas ki sargoshi-e-paiham ki chubhan

kash sar-chashma-e-awwal se utar aae koi rast kiran
jo meri ruh ki zulmat mein ujala kar de

main ki hun kor mujhe dekhne wala kar de