mere har lafz mein hai kausar-o-ganga ka lahu
adab-o-fan hi hain bikhre hue mere gesu

chaman-e-sharq mein raqsinda hain meri khushbu
daulat-e-ilm se aabaad hai mera pahlu

khun-e-dil se dur-e-shahwar kiye hain paida
main ne har ahd main fankar kiye hain paida

meri zulfon ko 'wali' ne bhi sanwara tha kabhi
mujh ko 'haali' ne mohabbat se pukara tha kabhi

'shefta' ne meri kashti ko ubhaara tha kabhi
'mushafi' ne mere chehre ko nikhaara tha kabhi

'zauq'-o-'momin' ne mera saz bajaya barson
'dagh' ne apne kaleje se lagaya barson

yaad to honge zamane ko wo 'insha'-o-'nazir'
yaad to honge zamane ko wo 'mir' aur 'amir'

yaad to honge zamane ko wo 'mehr' aur 'munir'
yaad to honge zamane ko 'anis' aur 'dabir'

mujh ko 'chakbast' ne 'jauhar' ne 'sharar' ne pala
main hun jis ko ki shahanshah-'zafar' ne pala

mere aaghosh mein pinhan hai mata-e-'sail'
ab bhi 'simab' se raqsinda hai meri mahfil

aaj bhi 'barq' se rakhshanda hai meri manzil
ab bhi baqi hain 'firaq'-o-'jigar'-o-'saghar'-o'dil'

apne hathon mein bahaaran ka uthae hue saz
aaj bhi hai meri mahfil mein bala-nosh 'majaz'

'asghar'-o-'akbar'-o-'ahsan' ki bhi dam-saz hun main
jis ko 'tulsi' ne bajaya tha wahi saz hun main

aaj bhi 'kaifi'-o-'mahrum' ki aawaz hun main
aaj bhi 'sahir'o-'sardar' ka eajaz hun main

falsafa mere sahife mein hai hikmat bhi hai
aarzu bhi mere aaghosh mein hasrat bhi hai

ab bhi abbas ka parcham hai meri mahfil mein
jada-paima hai 'niyaz' ab bhi meri manzil mein

ab bhi kaam aata hai aazar meri mushkil mein
'azmi' aaj bhi khandida hai mere dil mein

ab bhi zau-rezi-e-'akhtar' hai meri baaton mein
aaj bhi kirshn ki murli hai mere hathon mein

aaj be-kaif hun be-rang hun behaal hun main
khud yaganon ki nigahon se bhi pamal hun main

un se kah de ye koi aatish-e-sayyal hun main
'josh' ka josh hun 'iqbaal' ka iqbaal hun main

mere aaghosh mein 'ghaalib' bhi hain 'sarshaar' bhi hain
is nae daur ke aaghaz mein 'izhaar' bhi hain