jazbaat ke tufan mein ye zabt-e-fughan kab tak
majbur ye dil kab tak marub zaban kab tak

ye sud ke parde mein aahang-e-ziyan kab tak
alfaz ke phandon mein ejaz-e-bayan kab tak

aazad hawaon mein par tol nahin sakte
aghyar ke hathon mein umr-e-guzaran kab tak

uth jazba-e-khuddari ta-chand ziyan-kari
uth josh-e-hamiyyat uth ye khwab-e-giran kab tak

ehsas ki basti mein jab aag lagai hai
ai soz-e-darun aakhir nikle na dhuan kab tak

maqsad teri hasti ka poshida hai koshish mein
ye nafs-kushi ta-kai ye khwab-e-jinan kab tak

jina hai to jine ke andaz bhi paida kar
kaam aaenge aaba ke ye nam-o-nishan kab tak

kah dalin wo sab aakhir kahne ki jo thin baaten
khamosh 'bashir' aakhir rahti ye zaban kab tak