wajd mein hai jahan-e-sher-o-sukhan
sehr-e-sahir ki hukmrani hai

chashma-e-faiz shaeri us ki
us ke har sher mein rawani hai

us ki piri hai tarjuman-e-shabab
us ke sheron mein naujawani hai

ahl-e-mahfil hain jis ke shaidai
us ka andaz khush-bayani hai

ye husaini hai barhaman hamdam
us ka har sher jawedani hai

us ka iman hai jaan-e-yak-jehti
us ki fitrat mein mehrbani hai

dil ye hindu ka jaan musalman ki
ye sifat us ki khandani hai

jin buzurgon pe tha watan ko naz
un buzurgon ki ye nishani hai

us pe saya hai kaamyabi ka
us ki qismat mein kaamrani hai

'jafari' shaeri mein 'sahir' ki
har dukhi dil ki tarjumani hai