pani se huwaida hoti hai duniya mein khuda ki rahmat bhi
pani mein dikhai deti hai taswir-e-azab-o-lanat bhi

pani ki badaulat milti hai insan ko ghiza ki neamat bhi
sailab ki surat mein pani lata hai jahan par aafat bhi

ek jhil ke gahre pani par is waqt jami hai meri nazar
afkar hain danwa-dol mere jazbaat hain mere zer-o-zabar

main khushi khushi utrun is mein aur sath pe tairun hans hans kar
ya dub ke is ki lahron mein pa jaun gham-e-hasti se mafar