aadha bhuka aadha nanga
phir bhi apna desh hai changa

hath bhi dho lo pap bhi dho lo
bahti hai is desh mein ganga

rishwat kha kar team chuni thi
kaise jite match tiranga

sansad hai samman ke laiq
kaisa bhi ho chor lafanga

turat aayog bithaya dekho
hakim ne karwa ke danga

khap hamari kare faisle
court bane kyon bich adanga

jailon mein nirdosh bhare hain
sadkon par hain billa ranga

bachche bhi ab hue siyane
kaun kahe raja hai nanga

chup hai pisne wali janta
tu kyon leta hai re panga

yun bhi 'sada' kya kar paega
tere jaisa keet patanga