main shahr ke nawahi shor mein rahta hun rozana manon ke hisab se khamoshi ka siwrej mere ghar ke samne padaw dalta hai jis mein an-kahi baaton ke chhilke nauzaida taklifon ke wrappers aur chikhti shamon ki khali botalen badbu-dar galiyon ko janm deti hain main apni aawaz ka nikas chahta hun lafz agar barsat se pahle qaribi samaaton tak na pahunchen to zabanon ko dimak lag jati hai main ne khuda se guzarish ki hai baadalon ki aamad se qabl mujhe suraj se milne diya jae ta ki hararat jauhadon ko khushk karne mein muawin ho magar municipal kameti ke daftar mein baithne wale farishte chhuttiyon par hain shahr mujh se do hath ki duri par hai lekin mere pas loud-speaker nahin so main is chikham dhad ke manzar-name par apni jagah nahin bana sakta agar ye masala kuchh arse tak yunhi raha to majburan mujhe kashti daryaft karna hogi jise dariya ne dhutkar diya ho magar main nakhuda nahin hun zindagi mujh se kis qadar mazaq karti hai bhala do hath ki duri kitni der mein tai hoti hai mehrban saaton ka intizar mujhe qubuliyat se dur kyon rakhta hai