hum ek chae ki mez pe aa kar
ishq ka qissa le baithe the

har khatun badi komal thi
mard nihayat dil wale the

mo'tabaran-e-shahr mein ek ne
us ko flatuni thahraya

un ki sharik-e-hayat ne us par
tanz se ji-achchha! farmaya

padriyon mein ek ye bole
ishq gharelu ho na to is se

nazm-e-shikam barham hota hai
ek ladki ne puchha kaise?

ek khatun ne ye farmaya
ishq mein hai talwar ki tezi

aur is dauran mein uth kar
chae ki pyali shauhar ko di

ek gosha bilkul khali tha
tum bhi jo aatin hum mil rahte

ishq ka matlab sab pa jate
go hum munh se kuchh bhi na kahte