abr ke tukde nat-khat ladkon jaise ghum rahe hain
pani ki bauchhaaren kha kar paude jhum rahe hain

barkha-rani badi siyani baadal baadal dole
pi-hu pi-hu pankh pasare ban mein koyal bole

dhire dhire meindak apna saz bajate nikle
bhigi bhigi shant faza mein shor machate nikle

meindak rag suna to jhengur daude daude aaen
rang-manch par aane se wo pichhe kyon rah jaen

har naghme ki lai par jhume pedon ki hariyali
pawan suhane git sunae mahke dali dali

dali dali sundar komal phulon ki mahkar
rasta rasta gunje jaise taza git bahaar

jab dharti par barkha-rani chham chham karti aae
yun lagta hai sari dharti nikhri nikhri jae

jhar-jhar karta jharna bole sab ki pyas bujhao
ramte jogi bahta pani 'nashtar' ji ban jao