ai khuda
kaise main manun ki mitti se bani hai man bhi

khak to fani hai mit jati hai
aur la-fani ko fani main kaise manun

sach bata kaun chhupa hai is mein
zarf-e-insan mein wusat ye kahan se aae

wahi ulfat wahi shafqat wahi parda-poshi
ye to sifaten hain teri

main to hairan hun ek sada si ladki kyun-kar
haft-aflak ko chhu leti hai man bante hi

wo jo ek nur nihan subh-e-azal tu ne kiya tha is mein
karb-e-takhliq jagata hai jise

wo phir dard ki aakhiri had ko chhu kar
har su wo nur bikhar jata hai

nur hi nur se har ang racha hota hai
khak ka khol faqat dhoka hai

wo to sayyal mohabbat hai jo gardish mein hai
dard aur soz base hote hain ek ek nas mein

gosht aur post faqat parda hai
man to tamsil hai jannat ki teri

wahi wusat wahi thandak
aur wahi dudh ki shirin nahren

man to tafsir hai ulfat ki teri
apni makhluq se had apni mohabbat ki jatane ke liye

man ki mamta ko hi paimana banaya tu ne
sach bata kaun chhupa hai is mein

sach bata bhed ye kyon tu ne chhupa rakkha hai