shahr-e-viran ke makino ye suno tum faqat naqsh-ba-diwar rahe mujh ko dekho ki main aaina bana dekh raha hun kab se bahte dariyaon ke sine pe jo mallah hain kashti mein sawar aag lene ko kai bar gae the lekin laut aae the liye koela aur rakh ka dher tur se aai sada aaj hairan hun ki jab un ki wo kashti hui girdab ke hathon mein asir dubte dubte ubhre hain wo qindil-ba-kaf jis ke shoale ki zaban par hai likha main ujalon ka naqib mujh ko thame jo badhoge to suno kal jahan dhup mein lipti thi shabon ki rangat aur jahan khwab mein diwaren kiya karti thin baaten khud se wahin gunjegi sada ki khushbu qahqahe nur ke bikhrenge wahin aaj phir tur se aati hai sada shahr-e-viran ko jo gulzar banana hai to phir dub jaane do unhen apne kase mein liye koela aur rakh ka dher aur agar wo jo kinare se lage kat kar shoala-e-afzun ki zaban phir se kar lenge ujalon ko asir