uttho mere mahbub muridon ko jaga do
fan-karon ko iblis ka paigham suna do

jis mulk mein yaron ko mayassar na ho wine
us mulk ka har khosha-e-angur jala do

garmao adibon ka lahu whiskey-o-rum se
shair koi mil jae to tharra hi pila do

leader jo nazar aae to bolo ye adab se
taqrir mein tum garmi-e-whiskey se jila do

paper ke editor se agar kaam ho lena
chup-chap se office mein beer us ko pila do

har bazm mein angur ki beti ko bulao
mulla se andhere mein gale us ko laga do

shair koi mahfil mein agar pi ke na aae
wo padh na sake apni ghazal shor macha do

arbab-e-tadabbur jo hain aulad hamari
us ko mera har falsafa-e-zist sikha do

ehsas-e-hamiyyat na rahe dil mein kisi ke
petrol chhidak kar his-e-ghairat ko jala do

is shaer-e-gustakh ko 'asrar'-e-sukhan ko
is nazm ki takhliq pe phansi ki saza do