main ek aazad watan ki shahri hun
apne shahar ganw galiyon khet khaliyanon ke

sabhi raston ko jaanti
bin-dekhe sab darakhton ko

un ki khushbu se pahchan sakti hun
is mitti ki qabron mein

mere aaba ka lams shamil hai
main is ki mahak apni ruh mein mahsus karti hun

mere aangan mein utarte sab parinde
usi hawa mein sans lete hain jis mein main jiti hun

main apne parindon is mitti aur hawa ko chhod kar
kaise kahin aur zindagi ji sakti hun

main khaufzada to nahin
magar ab aksar kuchh guzargahon se guzarte hue

achanak mujhe rok kar mashini aale se check kiya jata hai
machine mere badan mein kuchh talash karti hai

mere libaade aur hand-bag ko khangala jata hai
mere hand-bag mein doctor ke chand nuskhon

ek qalam gulabi rang ki lipstick aur ek qadim se
mobile phone ke siwa

kuchh nahin nikalta
chand khunkhar kutte mujhe aur meri sawari ko sunghte hain

tab main apne aap se bhi nazren chura leti hun
is taklif-dah amal se jab kuchh hasil nahin hota

to mujhe aage jaane ki ijazat mil hi jati hai
main khaufzada to nahin

magar sochti hun
apne hi watan mein meri shanakht

itni mashkuk kyon ho gai hai