mahsur hun pani se main
par tishnagi se chur hun

mera wajud ek jam hai jam-e-tahi
khandan hain jis ke chaar-su

mai se bhare mina subu
pahli kiran phuti ki ek karb-e-nihan

jag uthta hai leta hua angdaiyan
din jaise jaise hota jata hai jawan

jwala-mukhi sa khaulne lagta hai sine ka lahu
main ek sulagti aarzu main ek tapti zindagi

pahna-e-imkanat mein jaulan bagulon ki tarah
sar-gashta apne hi khayalon ke hayulon ki tarah

khanjar chalati hai mere paikar pe baad-e-atishin
main ek gada

shadabiyon ke chand tukdon chand sikkon ke liye
daman pasare ruh ka

leta hun farsh-e-khak par kab se
mujhe khud bhi nahin koi pata

nakhlon ki thandi chhanw ka pyasa hun main
apne wajud-e-khushk ka hun nauha-khwan

lekin meri palkon pe aansu tak nahin
ai baadalo bach-bach ke jate baadalo

pani na do aansu to do