jaan-e-gulshan aur jaanan-e-bahaar
jawedan sham-e-shabistan-e-bahaar

ifitkhar-e-rozgar-e-be-sabaat
yaadgar-e-bazm-e-viran-e-bahaar

ek dimagh-e-sanat-e-marhum-e-hind
ek charagh-e-zer-e-daman-e-bahaar

ambarin sabze pe mukhtar-e-iram
marmarin afsar pe sultan-e-bahaar

waqai tabir-e-khwab-e-husn-o-ishq
aakhiri taswir-e-tufan-e-bahaar

khamushi ka naghma-e-mawwaj hai
taj ab bhi rifaton ka taj hai

subh-e-jannat ki sabahat is mein hai
sham-e-gulshan ki latafat is mein hai

is ke har lamhe mein ek taza bahaar
ek nai har waqt jannat is mein hai

maddiyat is ko chhu sakti nahin
ruh ki goya hukumat is mein hai

jalwa-kari kam se kam itni to ho
dekhiye jab ek nudrat us mein hai

husn ki jo maya-e-mumtaz thi
ab bhi pinhan wo amanat is mein hai

ishrate-nazzara ki mearaj hai
taj ab bhi azmaton ka taj hai

taj ek bijli hai lahraati hui
ek tajalli kaif mein dubi hui

ya jabin-e-hur ki koi shikan
ek bayaz-e-nur mein lipti hui

baam-o-dar se gumbad-o-minar se
har taraf ek chandni phaili hui

aah ye mahfil ziya-o-husn ki
chand-taron se murattab ki hui

is ke har goshe mein zarron ki tarah
daulat-e-kaunain hai bikhri hui

hai kahin nilam kahin pokhraj hai
taj ab bhi sanaton ka taj hai

wusat-e-kaun-o-makan ka aaina
jalwa-zar-e-kahkashan ka aaina

jis ko duniya kho ke roti hi rahi
is mata-e-raegan ka aaina

ek bazm-e-rafta ka matam-gusar
ek nishan-e-be-nishan ka aaina

dil-kusha taswir-e-subh-e-anjuman
dastan-e-pastan ka aaina

azmat-e-mumtaz ki ek jalwa-gah
shaukat-e-shah-jahan ka aaina

yaadgar-e-mahfil-e-taraj hai
taj ab bhi hairaton ka taj hai