bahut dinon se udas nazron ki rahguzar thi
padi thin suni ufuq ki rahen

ki dil ki mahfil mein
naghma o nala o nawa ki

ajab si shorish nahin hui thi
nazar uthai to dur dhundli fazaon mein

raushni ka ek daera sa dekha
laraz ke thahra jo dil

takhayyul ne apne shahpar faza mein khole
ki jaise

parwaz ka sahifa khule
to nile gagan ke asrar jag utthen

ki jaise
mah o nujum ki mamlikat ka rasta koi bata de

faza se parde koi utha de
ki jaise

ek be-kanar sahra mein
mauj-e-reg-e-rawan nuqush-e-nawi bana de

ki jaise taer-e-hawa ki lahron pe, jumbish-e-par se
dastan-e-wajud likh den

ki jaise
tarik shab ke daman mein

dast-e-qudrat, charagh-e-dil yak-ba-yak jala de