musalsal hawa ne
samete hain patton ke bikhre khazane

safede ki shakhon se taron ka jhurmut
mohabbat ke fitne ka jadu jagane

chala aa raha hai
andhere mein raushan

zamistan ki raaton ka yakh-basta joban
bhadakne laga hai sulagta tasawwur

tamanna ki iza-parasti ka daman
badha ja raha hai

ulajhne se hasil
hui hai na aasan hogi ye mushkil

bala-khez maujon ke raste mein tanha
khada hai samundar ka sad-chaak sahil

koi ga raha hai