tumhaare roz-o-shab se ab koi nisbat nahin lekin tumhaara 'aks har lamhe ke aaine mein milta hai bichhad kar tum se kitni shamen hans hans kar guzari hain sajae kaise-kaise gesuon mein phul ashkon ke lutai aabru-e-sajda kis-kis aastane par piye hain kis qadar chhalke hue talkhab aankhon ke mala chehre pe din ke kis tarah ghaza tabassum ka siye hain zakhm kis-kis tarh se be-khwab raaton ke tumhaare roz-o-shab se ab koi nisbat nahin lekin tumhaari shakl ka har ek chehre par hua dhoka sada jab bhi suni koi tumhaara nam yaad aaya nigah-e-lutf ki chhanw ne de di ho aman jaise kisi ko haal par apne kabhi jab mehrban paya tumhaara nam le kar pas aae dard ke sae tumhaara rup pa kar dil ne kis-kis ko na apnaya tumhaare roz-o-shab se ab koi nisbat nahin lekin tumhaara 'aks har lamhe ke aaine mein milta hai