gham tumhaara tha zindagi goya
tum ko khoya use nahin khoya

fart-e-girya se ji na halka ho
bas yahi soch kar nahin roya

ashk to ashk hain sharab se bhi
main ne ye dagh-e-dil nahin dhoya

main wo kisht-e-nashat kyon katun
jis ko main ne kabhi nahin boya

aabla aabla thi jaan phir bhi
bar-e-hasti ko umr bhar dhoya

dida-o-dil gawah hain jaanan
sukh se jaga na chain se soya

dusra koi sath ho ki na ho
tum mere pas hote ho goya