ek nazm kahni hai
do udas aankhon par

jaise gul khilana ho
zard zard shakhon par

mere kasa-e-fan mein tute-phute misre hain
aur dastaras mein dost kuchh khayal dhundhle hai

aur un khayalon mein ek iltija bhi hai
iltija bhi itni bas

honton pe lagi chup ko aap taj diya kije
ek do mahine mein khul ke hans liya kije

aur ye bhi kahna hai
jis jagah qadam rakkhen wo jahan mubarak ho

ek hasin panchhi ko aasman mubarak ho
sari khushiyan mil jaen jin pe aap ka haq ho

do udas aankhon ko janm din mubarak ho