kitni mithi zaban kaisi pyari zaban
meri urdu zaban fakhr-e-hindostan

is mein radha ke pael ki jhankar hai
zulf-e-zeb-un-nisa ki bhi mahkar hai

is mein jhansi ki rani ki lalkar hai
saz-o-naghma ke ham-rah talwar hai

us ke daman mein hain kitni ranginiyan
meri urdu zaban fakhr-e-hindostan

hind mata ki beti hai urdu zaban
sanwli chulbuli naujawan gul-fishan

hindu muslim ke ikhlas ki dastan
ittihad-o-mohabbat ka qaumi nishan

kyon ise ghair kahta hai na-qadr-dan
meri urdu zaban fakhr-e-hindostan

is mein sarmasti-e-jam-e-shiraaz hai
najd ka soz hai hind ka saz hai

apni har-dil-azizi mein mumtaz hai
ahl-e-hindostan ki ye aawaz hai

is ko kahte hain sab dil-kash-o-khush-bayan
meri urdu zaban fakhr-e-hindostan

boli jati hai kashmir se ras tak
samjhi jati hai gujraat madras tak

ghairiyat ki nahin is mein bu-bas tak
nafraton ka nahin is ko ehsas tak

khas hindostani hai urdu zaban
meri urdu zaban fakhr-e-hindostan

kah rahi hai ye bhaarat se urdu zaban
mujh se naraaz kyon madar-e-mehrban

tu meri main teri hamdam-o-raaz-dan
phir laga le gale se mujhe meri man

'tahira' kuchh pareshan hai urdu zaban
meri urdu zaban fakhr-e-hindostan