waqt sab se bada kahani-kar
jo azal se har chehre par

aafaqi kahaniyan likh kar
chehron ko lamha-ba-lamha dastan karne mein masruf

ek kahani ki takmil ke liye
an-ginat kirdar aasman se utarte hain

siyah o safed saaton ki barish mein bhigte kore chehron par
waqt saza jaza ki aisi la-zawal kahaniyan tahrir karta hai

ki kitne hi chehre kaenat ke ibrat-kade mein
aawezan hote hain

aur kitne hi raushniyon ke istiare bante hain
waqt ke pas

aasman se utarti kahaniyon ke
an-ginat dher lage pade hain

jinhen likh kar use
chehron ki kitni hi adhuri kitaben mukammal karni hain