raat ke gahre sannate mein
main ghar ke aangan mein tanha

chand ko kab se dekh raha hun
dil ki diwaron ko kab se

gham ki dimak chat rahi hai
zehn ke lambe se kamre mein

mere mazi ki almari
jis ke donon hi dar wa hain

ghaur se mujh ko dekh rahi hai
ji mein ye aata hai mere

mazi ki is almari se
jis mein buri bhali sab yaaden

upar niche chuni hui hain
chand suhani yaaden le lun

aur saja lun dil mein apne
lekin soch ke ye darta hun

gham ki dimak un yaadon ko
do hi pal mein chat na jae

yaadon ki ye pyari shaklen
phir main kaise dekh sakunga!