‘itr-o-kafur ki
khushbuon mein basa

ek maghmum jhonka hawa ka badha
aur meri sans se aa ke takra gaya

meri nazren uthin
chand kandhon pe rakkha tha bar-e-garan

ek rahi 'adam ki taraf tha rawan
karbnaki ki barq-e-tapan al-aman

meri ek ek rag mein utarti gai
chashm tar ho gai

zindagi ka ye anjam hai kya kahun
zindagi ke liye log marte hain kyon

maut haiat-faza raqs karti rahi
zindagi tabnaki ke saman liye

muskuraati rahi
fard ki maut se zindagi to kabhi khatm hoti nahin

khatm hoti nahin