har zarre pe fazl-e-kibriya hota hai
ek chashm-e-zadan mein kya se kya hota hai
asnam dabi zaban se ye kahte hain
wo chahe to patthar bhi khuda hota hai

har qatre mein bahr-e-marfat muzmar hai
har ek zarre mein kuchh na kuchh jauhar hai
ho chashm-e-basirat to har chiz achchhi
gar aankh na ho to lal bhi patthar hai

garmi mein gham-e-libaada na-zeba hai
masti mein khayal-e-baada na-zeba hai
kafi hai zarurat ke mutabiq duniya
duniya had se ziyaada na-zeba hai

tifli ne be-khudi ka aaghaz kiya
quwwat pe shabab ne bada naz kiya
panw ki taraf sar ko jhukaya hai 'rashid'
jis waqt se pairwi ne sarfaraaz kiya

piri mein hawas-o-hosh sab khote hain
kab ahd-e-jawani ke liye rote hain
hushiyar shabab mein the piri mein hain ghash
shab bhar jage the subah ko sote hain

nami hue be nishan hone ke liye
afsana hue bayan hone ke liye
ki maut qubul khwahish-e-jannat mein
hum pir hue jawan hone ke liye