ek ek lamha guzara ja raha hai hosh mein
ai zahe-qismat jo hain tufan ki aaghosh mein

ab ye aalam hai hamara bandagi ke josh mein
ek sajda be-khudi mein ek sajda hosh mein [...]

ye kahan se mauj-e-tarab uthi ki malal dil se nikal gae
wahi subh-o-sham jo the garan nafas-e-bahaar mein dhal gae

ye dayar-e-shauq hai ham-nashin yahan laghzishon mein bhi husn hai
jo mite wo aur ubhar gae jo gire wo aur sambhal gae [...]

in aankhon ki masti ke mastane hazaron hain
in aankhon se wabasta afsane hazaron hain
ek tum hi nahin tanha ulfat mein meri ruswa
is shahr mein tum jaise diwane hazaron hain
ek sirf hamin mai ko aankhon se pilate hain
kahne ko to duniya mein mai-khane hazaron hain
is sham-e-farozan ko aandhi se daraate ho
is sham-e-farozan ke parwane hazaron hain