har nae hadse pe hairani
pahle hoti thi ab nahin hoti

sukun-e-dil gaya nazron se sab qatare gae
chaman mein khilte hue jab se phul mare gae

hawa-e-maut zara der kya idhar aai
ki mere hath se ud kar mere ghubare gae [...]

zindagi se ek din mausam khafa ho jaenge
rang-e-gul aur bu-e-gul donon hawa ho jaenge

aankh se aansu nikal jaenge aur tahni se phul
waqt badlega to sab qaidi riha ho jaenge [...]

khush-gawar mausam mein
an-ginat tamashai
apni apni teamon ko
dad dene aate hain
apne apne pyaron ka
hausla badhate hain
main alag-thalag sab se
barahwen khiladi ko
hoot karta rahta hun
barahwan khiladi bhi
kya ajab khiladi hai
khel hota rahta hai
shor machta rahta hai
dad padti rahti hai
aur wo alag sab se
intizar karta hai
ek aisi saat ka
ek aise lamhe ka
jis mein saneha ho jae
phir wo khelne nikle
taliyon ke jhurmut mein
ek jumla-e-khush-kun
ek nara-e-tahsin
us ke nam par ho jae
sab khiladiyon ke sath
wo bhi mo'atabar ho jae
par ye kam hi hota hai
phir bhi log kahte hain
khel se khiladi ka
umr-bhar ka rishta hai
umr-bhar ka ye rishta
chhut bhi to sakta hai
aakhiri whistle ke sath
dub jaane wala dil
tut bhi to sakta hai
tum bhi iftikhar-arif
barahwen khiladi ho
intizar karte ho
ek aise lamhe ka
ek aisi saat ka
jis mein hadisa ho jae
jis mein saneha ho jae
tum bhi iftikhar-arif
tum bhi dub jaoge
tum bhi tut jaoge

ye jabr bhi dekha hai tarikh ki nazron ne
lamhon ne khata ki thi sadiyon ne saza pai

unhen sadiyon na bhulega zamana
yahan jo hadse kal ho gae hain