ab garm khabar maut ke aane ki hai
ghafil tujhe fikr aab-o-dane ki hai
hasti ke liye zarur ek din hai fana
aana tera dalil jaane ki hai

aafat-o-hawadis se bhari hai duniya
dukhdon se gharaz pati padi hai duniya
zinhaar talli nahin mera ye qaul
mere hi liye khalq hui hai duniya

ai raunaq-e-lala-zar wapas aa ja
ai daulat-e-barg-o-bar wapas aa ja
aise mein ki nau-bahaar hai khuld-ba-dosh
ai nazish-e-nau-bahaar wapas aa ja

ab jazba-e-wahshat ki qasam mat khao
rah rah ke mohabbat ki qasam mat khao
aankhon ki chamak khol na de sara bharam
khud apni sadaqat ki qasam mat khao

aati hai to khilti hai gulabon ki tarah
deti hai nasha tund sharabon ki tarah
lekin koi dekhe ye jawani ka maal
bikhri hai padhi hui kitabon ki tarah

aalam-o-masaib mein giraftar sahi
ek johd-e-musalsal ka saza-war sahi
kya samjhenge ahbab tabahi meri
main lakh baghawat ka gunahgar sahi

aata nahin sanson mein maza panne ka
khilta hi nahin zakhm mere sine ka
har roz agar ek rubai na kahun
hota nahin haq jaise ada jine ka

aankhen hain ki paigham mohabbat wale
bikhri hain laten ki nind mein hain kale
pahlu se laga hua hiran ka bachcha
kis pyar se hai baghal mein gardan dale

aawaz pe sangit ka hota hai bharam
karwat leti hai narm lai mein sargam
ye bol surile thartharaati hai faza
an-dekhe saz ka khanakna paiham

ab zer-e-qadam lahad ka bab aa pahuncha
hushiyar ho jald waqt-e-khwab aa pahuncha
piri ki bhi dopahar dhali aah 'anis'
hangam-e-ghurub-e-aftab aa pahuncha

afsos sharab pi raha hun tanha
ghalatan-ba-subu tamam khun-e-fan-ha
thithuri hui saghar mein nazar aati hai
sahba razi-allaho-taala-anha

ai dil jo ye aankh aaj ladai us ne
aur pal mein lada ke phir jhukai us ne
apni bebaki aur haya ki khubi
thi hum ko dikhani so dikhai us ne

ai mani-e-kainat mujh mein aa ja
ai raaz-e-sifat-o-zat mujh mein aa ja
sota sansar jhilmilate tare
ab bhig chali hai raat mujh mein aa ja

afsurda faza pe jaise chhaya ho hiras
duniya ko koi hawa bhi aati nahin ras
dubi jati ho jaise nabz-e-kaunain
jis baat pe husn aaj itna hai udas

aazadi-e-fikr o dars-e-hikmat hai gunah
dana ke liye nahin koi ja-e-panah
is azhdar-e-tahzib ke farzand-e-rashid
ye mazhab o qanun ayazan-billah

ab khwab se chaunk waqt-e-bedari hai
le zad-e-safar kuch ki tayyari hai
mar mar ke pahunchte hain musafir wan tak
ye qabr ki manzil bhi ghazab ki bhaari hai

ab walwale ishq ke tamanna mein nahin
majnun koi justuju-e-laila mein nahin
jaane guzre hain kis tarah se rah-rau
ek naqsh-e-qadam bhi reg-e-sahra mein nahin

aaba ko zamin o mulk par itminan
aulad ko sasti ye qanaat ka guman
bachche aawara aur be-kar jawan
hain aise gharane koi din ke mehman

aala rutbe mein har bashar se paya
afzal unhen khizr-e-rahbar se paya
ye dar jo na milta to bhatakte phirte
jannat ka pata ali ke ghar se paya

ab hind ki zulmat se nikalta hun main
taufiq rafiq ho to chalta hun main
taqdir ne bediyan to kati hain 'anis'
kyun ruk gae panw hath malta hun main

ai bakht-e-rasa su-e-najaf rahi kar
mujh zar ko zair-e-yad-ul-lahi kar
le ja su-e-karbala meri musht-e-ghubar
ai baad-e-saba itni hawa-khwahi kar

aflas achchha na fikr-e-daulat achchhi
jo dil ko pasand ho wo haalat achchhi
jis se islah-e-nafs na-mumkin ho
us aish se har tarah musibat achchhi

aashob-e-zamana se hai darna kaisa
buzdil ki tarah shikwa hai karna kaisa
marna to bahar-haal hai ek rose 'obaid'
marne se magar pahle hi marna kaisa

aadam ko ye tohfa ye hadiya na mila
aisa to kisi bashar ko paya na mila
allah-ri latafat-e-tan-e-pak-e-rasul
dhunda kiya aaftab saya na mila

aalam-o-masaib se lada karte hain
har ranj ko hans hans ke saha karte hain
har gham hamein paigham-e-tarab deta hai
hum gham ke talabgar raha karte hain