dard thamta hi nahin sine mein aaram ke baad
hum to jalte hain charaghon ki tarah sham ke baad

bas yahi soch ke akasr main laraz jata hun
jaane kya hoga mera hashr ke hangam ke baad

ishq kar baithe magar hum ne ye socha hi nahin
khak ho jaenge hum ishq ke anjam ke baad

likh ke kaghaz pe tera nam qalam tod diya
koi bhaya hi nahin mujh ko tere nam ke baad

gham ke sailab mein phir bah gaya maskan mera
chain paya hi tha ek barish-e-alam ke baad

mere qatil ne meri lash pe dam tod diya
wo pasheman tha bahut qatl ke ilzam ke baad

hum ne sikha hai hunar fath-o-zafaryabi ka
azm apna hai jawan koshish-e-nakaam ke baad

sang-sari-o-malamat hue ab apne nasib
hum to barbaad hue kucha-e-asnam ke baad

kya khizan aai ki barbaad hua sara chaman
rah gai aah-o-fughan gulshan-e-gulfam ke baad