did ki sadd-e-rah hai ye mizha
khar-e-pa-e-nigah hai ye mizha

nit taqatur hi us se rahta hai
rag-e-abr-e-siyah hai ye mizha

chashm meri wo bahr hain mawwaj
jis ke lab ki giyah hai ye mizha

aankhen teri wo ladne wali hain
sath jin ke sipah hai ye mizha

har tarah dil mein khub rahi hai tere
khwah barchhi hai khwah hai ye mizha

aankhen mal mal chhupate ho tum kyun
dekhna kya gunah hai ye mizha

dil mein kanta sa kuchh chubhe hai mere
ki 'hasan' kis ki aah hai ye mizha