dijiye rukhsat-e-bosa nahin le baithenge
pyare ye yaad rahe jaan bhi de baithenge

pa-e-diwar khade rahne na dije behtar
aur hat kar tere kucha mein pare baithenge

be-sar-o-pa hain kahan jaenge jun naqsh-e-qadam
khak-e-pa hum tere qadmon hi tale baithenge

aatish-e-ishq tere sokhtagan jun shoala
jab talak hain koi aaram liye baithenge

ru-ba-ru us ke 'asar' aap ba-in-zinda-dili
kab talak dil ke tain mare hue baithenge