mukhtasar shab ki tawalat nahin ki ja sakti
kam kisi taur aziyyat nahin ki ja sakti

hum ne to ek pari-wash se mohabbat ki hai
log kahte hain mohabbat nahin ki ja sakti

lakh hote hun sabab tark-e-sukunat ke magar
shahr-e-jaan se kabhi hijrat nahin ki ja sakti

mere nadan mat is ko meri fankari samajh
khud pe tari kabhi wahshat nahin ki ja sakti

wasl par dil hi kisi ka na ho mail jab tak
hijr ki puri zarurat nahin ki ja sakti

shart mat rakh ki rah-e-ishq-e-butan mein 'adil'
waqt ki ru se baghawat nahin ki ja sakti