asir-e-sham hain dhalte dikhai dete hain
ye log nind mein chalte dikhai dete hain

wo ek makan ki us mein koi nahin rahta
magar charagh se jalte dikhai dete hain

ye kaisa rang nazar aaya us ki aankhon mein
ki sare rang badalte dikhai dete hain

wo kaun log hain jo tishnagi ki shiddat se
kanar-e-ab pighalte dikhai dete hain

andheri raat mein bhi shahr ke darichon se
hamein to chand nikalte dikhai dete hain