gardish-e-arz ruke shab hai guzarne ke liye
koi uttha hai sitaron se utarne ke liye

zindagi tere masail ka sulajhna to alag
kis ko fursat hai yahan ghaur bhi karne ke liye

shakhsiyat-saz mohabbat ne badal di duniya
ab wo surat kahan baqi hai mukarne ke liye

lakh kar jae taraqqi fan-e-marham-sazi
baat ke zakhm to khulte nahin bharne ke liye

mushkilen majma-nigaron pe hui hain aasan
rasta khud kahin milta hai guzarne ke liye

kaukab-e-jam-o-subu farsh par dhalke honge
sham hum anjumani subh bikharne ke liye

shorish-e-dahr ko dahliz se takrane de
dar khula chhod na 'mani' koi jharne ke liye