o chashm-e-kaif-parwar mai-khana-e-mohabbat
labrez-e-ranj-o-gham hai paimana-e-mohabbat

be-dard be-murawwat begana-e-mohabbat
ek din suna to hota afsana-e-mohabbat

ummid-war-e-dil ko yun todta hai koi
ai dost bas na thukra nazrana-e-mohabbat

mana ki ek ada hai sabr-azma tajahul
taham na is qadar ban begana-e-mohabbat

phir dhundhta hai 'kaukab' wo rang-e-mai-gusari
saqi ki har nazar ho paimana-e-mohabbat