aadmi aur dard se na-ashna mumkin nahin
aks se khali ho koi aaina mumkin nahin

aadmi insan-e-kaamil ban to sakta hai magar
zindagi bhar rah sake wo parsa mumkin nahin

do kinare jaise dariya ke nahin milte kabhi
hum se iqdam-e-jafa un se wafa! mumkin nahin

kar-farma jab rahe barq-e-nazar aathon pahar
shahr bhar mein ho na koi hadsa! mumkin nahin

kis qadar himmat-shikan hai gumrahi ka ye jawaz
rahbari az-ibtida ta-intiha mumkin nahin

shisha koi chur ho jae to phir kis kaam ka
mit ke ho aabaad aiwan-e-wafa mumkin nahin

aap patthar ko nichoden is se kya hasil 'matin'
tang-dil insan ho haq-ashna mumkin nahin