aae aane ko hazaron gham hazaron gham gae
gham ziyaada se ziyaada aae kam se kam gae

dam dilase hausle dete masiha dam gae
aae be-had khush magar ba-dida-e-pur-nam gae

ab na aana tum pae bimar-pursi dosto
ab yahi alfaz kafi hain tum aae hum gae

ud gae to ud gae kafur ki manind hum
jam gae to anjuman mein surat-e-yakh jam gae

dar-ba-dar dhuni ramane wale ramte ab kahan
dar-ba-dar dhuni ramane wale ramte ram gae

yurish-e-barq-o-bala mein kab mera dam-kham gaya
jal gai rassi to kya kya us ke pech-o-kham gae

ab to apne aap mein bhi hazrat-e-adam nahin
ab to apne aap se bhi hazrat-e-adam gae